ಚಾಂಪಿಯನ್ಸ್​ ಟ್ರೋಫಿ ಅರ್ಹತೆ ಮೇಲೆ ಕಣ್ಣು; ನೆದರ್ಲ್ಯಾಂಡ್ಸ್​-ಇಂಗ್ಲೆಂಡ್​ ಮಧ್ಯೆ ಬಿಗ್​ ಫೈಟ್

2025ರ ಚಾಂಪಿಯನ್ಸ್​ ಟ್ರೋಫಿಗೆ ಅರ್ಹತೆ ಪಡೆಯಬೇಕಾದ್ರೆ ಇಂಗ್ಲೆಂಡ್​ ತಂಡಕ್ಕೆ ಮುಂದಿನ ಎರಡು ಪಂದ್ಯಗಳ ಗೆಲುವು ಅನಿವಾರ್ಯವಾಗಿದೆ. ಇಂದು ನಡೆಯುವ ನೆದರ್ಲ್ಯಾಂಡ್ಸ್​ ವಿರುದ್ಧ ಮತ್ತು ನವೆಂಬರ್​ 11ರಂದು ನಡೆಯುವ ಪಾಕಿಸ್ತಾನ ವಿರುದ್ಧ ಗೆದ್ರೂ ಸಹಿತ ಚಾಂಪಿಯನ್ಸ್​ ಟ್ರೋಫಿಗೆ ಅರ್ಹತೆ ಪಡೆಯುವುದು ಅಷ್ಟು ಸುಲಭದ ಮಾತಲ್ಲ.

ಹೌದು, ಇಲ್ಲಿನ ಮಹಾರಾಷ್ಟ್ರ ಕ್ರಿಕೆಟ್ ಅಸೋಸಿಯೇಷನ್ ಸ್ಟೇಡಿಯಂನಲ್ಲಿ ಇಂದು ನಡೆಯುವ ಪಂದ್ಯ ಬಹಳ ರೋಚಕದಿಂದ ಕೂಡಿದೆ. ಹಾಲಿ ಚಾಂಪಿಯನ್ಸ್​ ಇಂಗ್ಲೆಂಡ್​ ಮತ್ತು ನೆದರ್ಲ್ಯಾಂಡ್ಸ್ ತಂಡಗಳ ಮಧ್ಯೆ ಬಿಗ್​ ಫೈಟ್​ ನಡೆಯಲಿದೆ. ಇಂದು ವಿಶ್ವಕಪ್​ನಲ್ಲಿ ನಡೆಯುವ ಈ ಪಂದ್ಯ ಔಪಚಾರಿಕವಾಗಿದ್ರೂ ಸಹ ಇಂಗ್ಲೆಂಡ್​ ಮತ್ತು ನೆದರ್ಲ್ಯಾಂಡ್ಸ್​ಗೆ ಮಹತ್ವದ್ದಾಗಿದೆ. ಏಕೆಂದ್ರೆ ಮುಂಬರುವ ಚಾಂಪಿಯನ್ಸ್​ ಟ್ರೋಫಿಗೆ ಅರ್ಹತೆ ಗಿಟ್ಟಿಸಿಕೊಳ್ಳಬೇಕಾದ್ರೆ ಉಭಯ ತಂಡಗಳು ಈ ಪಂದ್ಯದಲ್ಲಿ ಗೆಲುವು ದಾಖಲಿಸಿವುದು ಮುಖ್ಯವಾಗಿದೆ.

ಲೀಗ್​ ಹಂತದ ಪಾಯಿಂಟ್​ ಪಟ್ಟಿಯಲ್ಲಿ ನೆದರ್ಲ್ಯಾಂಡ್ಸ್​ ತಂಡ 9ನೇ ಸ್ಥಾನ ಮತ್ತು ಇಂಗ್ಲೆಂಡ್​ ತಂಡ 10ನೇ ಸ್ಥಾನವನ್ನು ಅಲಂಕರಿಸಿವೆ. 2025ರ ಚಾಂಪಿಯನ್ಸ್ ಟ್ರೋಫಿಗೆ ಪ್ರಸ್ತುತ ನಡೆಯುತ್ತಿರುವ 2023ರ ವಿಶ್ವಕಪ್​ನ ಲೀಗ್​ ಹಂತದ ಅಂಕಪಟ್ಟಿಯನ್ನು ಪರಿಗಣನೆಗೆ ತೆಗೆದುಕೊಳ್ಳಲಾಗುತ್ತದೆ. ಲೀಗ್ ಪಂದ್ಯಗಳು ಮುಗಿದ ನಂತರ ಟಾಪ್​ 7 ಸ್ಥಾನದಲ್ಲಿರುವ ತಂಡಗಳು ಮತ್ತು ಆತಿಥೇಯ ಪಾಕಿಸ್ತಾನ ಸ್ಪರ್ಧಿಸಲಿದೆ. ಸದ್ಯ ಲೀಗ್​ ಹಂತದ ಪಾಯಿಂಟ್​ ಪಟ್ಟಿಯ 8ರ ಘಟ್ಟದಲ್ಲಿ ಸ್ಥಾನ ಪಡೆಯಲು ಉಭಯ ತಂಡಗಳು ಬಹಳಷ್ಟು ಕಸರತ್ತು ನಡೆಸಿವೆ. ಒಂದು ವೇಳೆ ಈ ಪಂದ್ಯವನ್ನು ನೆದರ್ಲ್ಯಾಂಡ್ಸ್​ ತಂಡ ಗೆದ್ರೆ ಬಹುತೇಕ ಮುಂಬರುವ ಚಾಂಪಿಯನ್ಸ್​ ಟ್ರೋಫಿಗೆ ಅರ್ಹತೆ ಪಡೆದುಕೊಳ್ಳಲಿದೆ. ಒಂದು ವೇಳೆ ಈ ಪಂದ್ಯದಲ್ಲಿ ಡಚ್ಚರು ಸೋಲನ್ನಪ್ಪಿದ್ರೂ ಸಹ ಮತ್ತೊಂದು ಅವಕಾಶ ಸಿಗಲಿದೆ.

ಇನ್ನು ಇಂಗ್ಲೆಂಡ್​ ತಂಡಕ್ಕೆ ಇಂತಹ ಅವಕಾಶವಿಲ್ಲ. ಏಕೆಂದ್ರೆ ಆಡಿರುವ ಏಳು ಪಂದ್ಯಗಳಲ್ಲಿ ಕೇವಲ ಒಂದು ಪಂದ್ಯದಲ್ಲಿ ಮಾತ್ರ ಗೆಲುವು ದಾಖಲಿಸಿ ಉಳಿದ ಪಂದ್ಯದಲ್ಲಿ ಸೋಲು ಅನುಭವಿಸಿರುವ ಇಂಗ್ಲೆಂಡ್​ ತಂಡ ಪಾಯಿಂಟ್​ ಪಟ್ಟಿಯಲ್ಲಿ 2 ಅಂಕ ಪಡೆದು 10ನೇ ಸ್ಥಾನದಲ್ಲಿದೆ. ಮುಂದಿನ ಎರಡು ಪಂದ್ಯಗಳಲ್ಲಿ ಇಂಗ್ಲೆಂಡ್​ ಗೆಲುವು ಸಾಧಿಸಿದ್ರೂ ಸಹಿತ ಲೀಗ್​ ಹಂತದ ಪಾಯಿಂಟ್​ ಪಟ್ಟಿಯ ಎಂಟರ ಘಟ್ಟದಲ್ಲಿ ಸ್ಥಾನ ಪಡೆಯುವ ಅವಕಾಶ ತೀರಾ ಕಡಿಮೆ ಇದೆ. ಏಕೆಂದ್ರೆ ಇತರ ತಂಡಗಳ ಫಲಿತಾಂಶಗಳು ಮತ್ತು ರನ್ ರೇಟ್ ನಿರ್ಣಾಯಕವಾಗಿದೆ. ಒಂದು ವೇಳೆ ಎರಡು ಪಂದ್ಯದಲ್ಲಿ ಒಂದು ಸೋತರೂ ಸಹ ಇಂಗ್ಲೆಂಡ್​ ತಂಡದ ಚಾಂಪಿಯನ್ಸ್​ ಟ್ರೋಫಿಯಲ್ಲಿ ಅರ್ಹತೆ ಗಿಟ್ಟಿಸಿಕೊಳ್ಳುವ ಕನಸು ಭಗ್ನವಾಗಲಿದೆ.